जतमई मंदिर मा अवैध वसूली – श्रद्धालु मन ले जबरन लेवत हें पार्किंग के नाम म पइसा
छुरा :- सावन महीना म जिहां एक ओर श्रद्धालु मन जतमई धाम दर्शन बर भारी संख्या म पहुँचत हें, ओहिच जगा म अब कुछ मनखे मन आस्था के नाम म अवैध वसूली करत हें। जतमई सेवा समिति द्वारा मंदिर पास म पार्किंग के ठेका एक झिन ला देय गे हे, फेर अब उही ठेका जबरन पइसा वसूलई के जरिया बन गे हे।
पार्किंग ठेकेदार केवल पार्किंग एरिया म खड़े गाड़ी ले नही, बल्कि मंदिर ले 300 मीटर दूर पांडूका अउ छुरा रोड म खड़े गाड़ी मन ले घलो पार्किंग के नाम म पइसा लेवत हे। इही नइ, जे गाड़ी मन मंदिर नइ जावत, वोमन जे सड़क ले अपन काम से गुजरत हें, ओमन ले घलो ‘पर्ची कटवाय बर’ कहिके पइसा वसूलत हें।
सोमवार के दिन जइसे ही कुछ झिन मन ए अवैध वसूली के विरोध करे, त ठेकेदार के मनखे मन गाड़ी वाला संग बहस म उतर आइन। ओमन कहिथें के ए साल पार्किंग के ठेका 10 लाख म होइस हे, अउ समिति कहिस हे त हमन दूर खड़े गाड़ी मन ले घलो पइसा लेवत हन।
श्रद्धालु मन कहिथें के ए अवैध वसूली म तुंहरों तुरते रोक लगाय जाय। आस्था के जगा म डर अउ जबरदस्ती के जगा नइ होय चाही। जतमई मंदिर दर्शन बर आइस श्रद्धालु मन प्रशासन ले मांग करत हें के ए लूट-जइसन वसूली ऊपर तुरंत कारवाही होवय।
अब सवाल हे – श्रद्धा के जगा लूट के हक काकर? प्रशासन का कब जागही?
